Framlag Íslands til eflingar á starfsemi ÖSE gegn mansali og kynlífsþrælkun
Nr. 048
FRÉTTATILKYNNING
frá utanríkisráðuneytinu
frá utanríkisráðuneytinu
Íslensk stjórnvöld hafa í störfum sínum lagt áherslu á mannréttindamál, réttindi barna og baráttuna gegn mansali og voru þessar áherslur Íslands áréttaðar á ráðherrafundi ÖSE í Portó 6.-7. desember 2002. Varlega áætlað er talið að þúsundir stúlkubarna og kvenna hafi verið þvingaðar til vændis og kynlífsþrælkunar á Balkanskaga undanfarin ár.
ÖSE telur baráttuna gegn þessum hörmulegu glæpum forgangsverkefni á Balkanskaga. Minna má á að þessi glæpastarfsemi er nátengd ólöglegri verslun með vopn, eiturlyfjasölu- og smygli og fjármögnun hryðjuverka. ÖSE hefur með markvissum hætti aukið aðgerðir sínar í baráttunni gegn mansali og kynlífsþrælkun á Balkanskaga á undanförnum árum.
Í ljósi þeirrar áherslu sem íslensk stjórnvöld leggja á þennan mikilvæga málaflokk á vegum ÖSE hefur Bosníunefnd ákveðið að veita 2,5 milljónum króna til eflingar starfsemi ÖSE gegn mansali og kynlífsþrælkun kvenna og stúlkubarna í Bosníu og Hersegóvínu.
Þetta fjárframlag íslenskra stjórnvalda verður notað til að ráða innlendan sérfræðing til sendinefndar ÖSE í Bosníu-Herzegóvínu til tveggja ára. Að frumkvæði Íslands hafa verið unnin drög að starfslýsingu fyrir viðkomandi sérfræðing en starf hans yrði sérstaklega fólgið í aukinni fræðslu og eflingu vitundar almennings (awareness raising) um mansal og ofbeldi gegn konum og börnum í Bosníu. Einnig yrði það hlutverk hans að sinna samskiptum við frjáls félagasamtök á þessu sviði auk skipulagningar aðstoðar við fórnarlömb mansals til að efla eftirfylgni innlendra stjórnvalda vegna landsáætlunar Bosníu og Hersegóvínu gegn mansali.
Utanríkisráðuneytið
Reykjavík, 9. maí 2003