Afhending trúnaðarbréfs

Hinn 10. mars 2004, afhenti Ólafur Egilsson, sendiherra, forseta Indónesíu, frú Megawati Soekarnoputri, trúnaðarbréf sitt sem sendiherra Íslands í Indónesíu með aðsetur í Reykjavík.

Í viðræðum sem fram fóru við indónesíska ráðamenn í tengslum við afhendinguna lýstu þeir yfir vilja sínum til nánara tvíhliða samstarfs við Íslendinga m.a. á sviði sjávarútvegs og jarðhitanýtingar. Fiskvinnsluvélar hafa upp á síðkastið verið helsta íslenska útflutningsvaran til Indónesíu en m.a. húsgögn og fatnaður verið keypt þaðan.

Nokkrir Indónesar hafa sótt Jarðhitaskóla Sameinuðu þjóðanna í Reykjavík á undanförnum árum og eru þrír nú væntanlegir í skólann. Unnið er að gerð loftferðasamnings milli Íslands og Indónesíu til þess að styrkja stöðu íslenskra flugrekenda sem eiga þarna töluverðra hagsmuna að gæta vegna stórra verkefna sem fengist hafa í þessum heimshluta, m.a. pílagrímaflug. Sérstakur áhugi kom fram hjá Indónesum á tilraunarekstri vetnisknúinna strætisvagna sem fram fer í Reykjavík þar sem mengun er verulegt vandamál í Jakarta og bifreiðum fer nú ört fjölgandi í landinu með batnandi afkomu. Indónesía hefur unnið sig upp úr efnahagskreppunni sem herjaði Asíulönd og er árlegur hagvöxtur þar orðinn yfir 4%. Lýðræði er að styrkjast, m.a. verður forseti lýðveldisins í fyrsta skipti þjóðkjörinn í kosningunum sem fram eiga að fara í sumar. Nýhafin er kosningabarátta fyrir þingkosningar í næsta mánuði og takast þar á frambjóðendur 24 stjórnmálaflokka.