Baráttan gegn hryðjuverkum og átökin í Úkraínu efst á baugi
Spenna og óvissa í alþjóðlegum öryggismálum setti svip sinn á ráðherrafund Öryggis- og samvinnustofnunar Evrópu (ÖSE) sem lauk í Belgrad í fyrrakvöld. Eindregin samstaða var meðal aðildarríkjanna 57 að veruleg ógn stafaði af uppgangi öfga- og hryðjuverkasamtakanna Daesh í Sýrlandi og Írak og að bregðast yrði við með skýrum hætti. Átökin í Úkraínu voru annað meginmál fundarins en innlimun Rússlands á Krímskaga og stuðningur við vopnaða aðskilnaðarsinna í Austur-Úkraínu fela í sér brot á grunnsamþykktum ÖSE-samstarfsins. Lof var borið á hlutverk ÖSE við sáttamiðlun í Úkraínu en á sjöunda hundrað alþjóðlegra eftirlitsmanna stofnunarinnar eru að störfum í landinu.
Á fundinum var einnig rætt um mikilvægi þess að taka sameiginlega á flóttamannavandanum, að stemma stigu við hlýnun jarðar, endurnýja afvopnunarsamninga og standa vörð um grundvallarmannréttindi sem víða eiga undir högg að sækja.
Fundurinn markaði lok formennskutíðar Serbíu í ÖSE en Þýskaland tekur við formennskunni um næstu áramót.