Opinber heimsókn utanríkisráðherra Slóvakíu
Nr. 027
FRÉTTATILKYNNING
frá utanríkisráðuneytinu
frá utanríkisráðuneytinu
Eduard Kukan, utanríkisráðherra Slóvakíu, kemur í opinbera heimsókn til Íslands 14. - 16. apríl næstkomandi í boði Halldórs Ásgrímssonar, utanríkisráðherra.
Á fundi utanríkisráðherra Íslands og Slóvakíu mánudaginn 15. apríl verða gagnkvæm samskipti ríkjanna efst á baugi og ennfremur munu ráðherrarnir undirrita samning um afnám tvísköttunar. Ráðherrarnir munu einnig ræða öryggismál í Evrópu, málefni Atlantshafsbandalagsins og undirbúning vorfundar bandalagsins og samstarfsríkja þess í Reykjavík 14.- 15. maí næstkomandi.
Þess má geta að Slóvakía er á meðal níu ríkja sem sótt hafa um aðild að Atlantshafsbandalaginu.
Utanríkisráðherra Slóvakíu mun jafnframt eiga fund með Davíð Oddssyni, forsætisráðherra, opna nýja skrifstofu kjörræðismanns Slóvakíu á Íslandi og halda fyrirlestur um stefnu Slóvakíu í utanríkismálum og stöðu landsins með tilliti til hugsanlegrar aðildar að Evrópusambandinu og Atlantshafsbandalaginu.
Fyrirlesturinn er haldinn í Norræna húsinu í boði Félags stjórnmálafræðinga og stjórnmálafræðiskorar Háskóla Íslands og hefst hann kl. 14.45 mánudaginn 15. apríl næstkomandi.
Utanríkisráðuneytið
Reykjavík, 12. apríl 2002