Greiðsluafkoma ríkissjóðs janúar-september 2008

• Greiðsluafkoma ríkissjóðs janúar-september 2008 (PDF 62K)

Greiðsluuppgjör ríkissjóðs eftir fyrstu níu mánuði ársins liggur nú fyrir. Samkvæmt uppgjörinu er handbært fé frá rekstri 19,2 ma.kr. innan ársins samanborið við 48,6 ma.kr. á sama tímabili í fyrra. Innheimtar tekjur voru 11,6 ma.kr. hærri en á árinu 2007 en gjöldin voru 49,9 ma.kr. hærri nú en í fyrra. Hreinn lánsfjárjöfnuður er jákvæður um 27,7 ma.kr. sem er 45,6 ma.kr. betri útkoma en í fyrra.

Sjóðstreymi ríkissjóðs janúar–september 2004-2008

Innheimtar tekjur ríkissjóðs námu 332 ma.kr. á fyrstu níu mánuðum ársins sem er aukning um 12 ma.kr. frá því á sama tíma í fyrra eða 3,6% aukning að nafnvirði. Skatttekjur og tryggingagjöld námu 302 ma.kr. sem samsvarar 3,6% aukningu að nafnvirði á milli ára. Á sama tíma hefur almennt verðlag hækkað um 9,9% (VNV án húsnæðis) og skatttekjur og tryggingagjöld hafa því dregist saman um 5,8% að raunvirði. Aðrar tekjur jukust um 4,1% og þar af er mest hækkun á vaxtatekjum af bankainnstæðum eða 91,2%.

Skattar á tekjur og hagnað námu um 115 ma.kr. sem er aukning um 10,5% frá sama tíma árið áður. Þar af nam tekjuskattur einstaklinga 64 ma.kr. (aukning um 5,6%), tekjuskattur lögaðila 20 ma.kr. (aukning um 4,9%) og fjármagnstekjuskattur 32 ma.kr. (aukning um 26,7%). Innheimta eignarskatta var um 6 ma.kr. sem er samdráttur upp á 27,1% á milli ára. Þar af námu stimpilgjöld tæpum 5 ma.kr. en innheimta þeirra hefur dregist saman um 2 ma.kr. frá fyrra ári.

Innheimta veltuskatta í septembermánuði skilaði ríkissjóði rúmum 16 ma.kr. sem er jafnmikið að nafnvirði og í sama mánuði í fyrra. Frá ársbyrjun hafa veltuskattar skilað ríkissjóði 141 ma.kr. og dregist lítillega saman að nafnvirði frá sama tíma árið áður eða um 0,9% en samdrátturinn er 9,9% að raunvirði (miðað við hækkun vísitölu neysluverðs án húsnæðis). Þegar horft er á 6 mánaða hlaupandi meðaltal nemur raunlækkun veltuskatta nú 15,8% á milli ára sem er mesta raunlækkun um árabil eins og sést á myndinni hér að neðan. Þetta er enn ein vísbending um að dregið hefur verulega úr umsvifum í hagkerfinu. Virðisaukaskattur er stærsti hluti veltuskattanna og skilaði hann ríkissjóði 99 ma.kr. á tímabilinu sem er 0,6% samdráttur að nafnvirði frá fyrstu níu mánuðum ársins 2007 og 9,5% raunsamdráttur. Aðrir veltuskattar, sem eru einkum ýmis vörugjöld, námu um 42 ma.kr. á fyrstu níu mánuðum ársins og drógust saman um 1,8% frá sama tíma 2007. Mestur samdráttur er í vörugjöldum af ökutækjum, sem hafa verið stærsti liður vörugjaldanna undanfarin ár, eða 17% samdráttur. Tekjur af tollum og aðflutningsgjöldum námu 5 ma.kr. og tekjur af tryggingagjöldum 31 ma.kr. sem er aukning um annars vegar 14,9% og hins vegar 6% á milli ára.

Greidd gjöld nema 318,6 ma.kr. og er það hækkun um 49,9 ma.kr. frá fyrra ári eða 18,6%. Mest aukning er vegna almannatrygginga- og velferðarmála 14,3 ma.kr. eða 22,1%. Þar munar mest um lífeyristryggingar sem hækka um 9 ma.kr. á milli ára, fæðingarorlofsgreiðslur um 1,2 ma.kr. og vaxtabætur um 1,4 ma.kr. Efnahags- og atvinnumál hækka um 11 ma.kr. á milli ára eða tæp 31% þar sem mestu munar um stofnanir samgönguráðuneytisins. Þá hækkar almenn opinber þjónusta um 8,3 ma.kr. eða 23% og heilbrigðismál um 8,1 ma.kr. eða tæp 12%. Hlutfallslega er mest hækkun á liðnum varnarmál eða 37%, en málaflokkurinn í heild er mjög veigalítill í heildarútgjöldum ríkisins.

Hreinn lánsfjárjöfnuður ríkissjóðs var jákvæður um 27,7 ma.kr. Afborganir lána námu 45,5 ma.kr., þar af voru 30 ma.kr. til niðurgreiðslu innlendra skulda. Greiðslur til LSR og LH námu 2.970 ma.kr. Lántökur námu 208,4 ma.kr., þar sem 101,7 ma.kr. voru teknir að láni innanlands. Lántökur eru umfram lánsfjárþörf en ákvörðun var tekin á vormánuðum um að auka útgáfur á stuttum ríkisbréfum í því skyni að auka virkni á skuldabréfa- og gjaldeyrismarkaði.

Tekjur ríkissjóðs janúar-september 2006-2008

Gjöld ríkissjóðs janúar–september 2006-2008