Niðurstöður fjórðu ráðherrastefnu Alþjóðaviðskiptastofnunarinnar
FRÉTTATILKYNNING
frá utanríkisráðuneytinu
________
Nr. 115
Á ráðherrastefnu 144 aðildarríkja Alþjóðaviðskiptastofnunarinnar (WTO), sem haldin var í Doha, Katar, dagana 9. til 14. nóvember 2001, var samþykkt að hefja nýjar samningaviðræður um alþjóðaviðskipti, í því skyni að draga enn frekar úr viðskiptahömlum og fella fleiri svið viðskipta undir alþjóðlegar reglur. Sendinefnd Íslands var leidd af Valgerði Sverrisdóttur, iðnaðar- og viðskiptaráðherra.
Hér verður gerð grein fyrir helstu ákvörðunum sem felast í ráðherrayfirlýsingu fundarins.
- 1. Landbúnaður
2. Þjónustuviðskipti
Aðildarríkin ítrekuðu skuldbindingar sínar um að halda áfram viðræðum um alla þætti þjónustuviðskipta með það að markmiði að auka frjálsræði í þessum viðskiptum og leggja af hvers kyns hömlur. Viðræðurnar hófust í byrjun síðasta árs.
3. Markaðsaðgangur
Hafnar verða samningaviðræður um lækkun tolla á iðnaðarvörum, þ. m. t. sjávarafurðum. Jafnframt verði dregið úr öðrum viðskiptahindrunum eða þær afnumdar. Iðnaðar- og viðskiptaráðherra lagði áherslu á mikilvægi fríverslunar með sjávarafurðir í þessu sambandi.
Sérstaklega verður tekið á ríkisstyrkjum í sjávarútvegi. Markmiðið er að setja reglur um beitingu ríkisstyrkja og stuðla að afnámi þeirra. Iðnaðar- og viðskiptaráðherra lagði mikla áherslu á þennan þátt viðræðnanna en Ísland ásamt fleiri ríkjum átti frumkvæði að þessu máli og leiddi það í undirbúningi fyrir ráðherrastefnuna.
5. Samningurinn um hugverkaréttindi og aðgangur að lyfjum
Aðilarríkin samþykktu ályktun um að heimila framleiðslu á lyfjum án þess að handhafi hugverkaréttar njóti ávinnings í þeim tilfellum þegar neyðarástand ríkir. Þessu er sérstaklega beint að því neyðarástandi sem ríkir t.d. á einstökum svæðum í Afríku vegna alnæmis.
6. Önnur mál
Samningaviðræður verða hafnar um tvö ný mál á vettvangi WTO. Þessi mál eru annars vegar reglur er varða opinber innkaup og hins vegar reglur um leiðir stjórnvalda til að einfalda tollmeðferð. Jafnframt var samþykkt að vinnu við fjárfestinga- og samkeppnismál yrði framhaldið á vettvangi WTO með það að markmiði að hefja samningaviðræður um þessa málaflokka síðar.
7. Skipulag viðræðnanna
Samningaviðræðurnar hefjast í ársbyrjun 2002 og fjalla um öll viðfangsefnin samtímis og er gert ráð fyrir að engum samningum teljist lokið fyrr en samkomulag liggur fyrir á öllum sviðum. Gert er ráð fyrir að samningalotunni ljúki á þremur árum. Sett verður á fót aðalsamninganefnd og undirnefndir í einstökum málaflokkum. Ljóst er því að mikilvægar samningaviðræður eru framundan sem varða miklu fyrir íslenska viðskiptahagsmuni.
Í aðildarviðræðum Kína að WTO sömdu Ísland og Kína um lækkun tolla á mikilvægum sjávarafurðum. Í tollskrá Kína eru 152 vöruflokkar fyrir sjávarafurðir og samdi Ísland um lækkun tolla á 52 þeirra. Kína innheimtir allt að 30% toll í innflutningi á sjávarafurðir. Ísland náði mikilvægum samningum um að tollar verði 2 til 16% á flestar sjávarafurðir sem Ísland flytur út og allar sem eru mikilvægar á markaði Kína.
Utanríkisráðuneytið
Reykjavík, 14. nóvember 2001.