Undirritun alþjóðasamnings Sameinuðu þjóðanna gegn skipulagðri alþjóðlegri glæpastarfsemi.
FRÉTTATILKYNNING
frá utanríkisráðuneytinu
________
Nr. 116
Halldór Ásgrímsson, utanríkisráðherra undirritaði í New York í gær, 15. nóvember 2001, bókun við alþjóðasamning Sameinuðu þjóðanna gegn skipulagðri alþjóðlegri glæpastarfsemi. Bókunin fjallar um bann við ólöglegri framleiðslu og dreifingu á vopnum, vopnahlutum, vopnabúnaði og skotfærum. Samningurinn sjálfur var undirritaður af Íslands hálfu í desember á síðastliðnu ári ásamt tveimur öðrum bókunum við hann, annars vegar um baráttu gegn ánauð og misnotkun kvenna og barna og hins vegar um aðgerðir gegn smygli á ólöglegum innflytjendum.
Utanríkisráðuneytið
Reykjavík, 16. nóvember 2001.