Íslensk-kínversk viðskiptaviðræðunefnd
FRÉTTATILKYNNING
frá utanríkisráðuneytinu
_____________
Nr. 070
Dagana 18.-21. september nk. verður hér á landi átta manna sendinefnd háttsettra embættismanna frá ráðuneytum
utanríkisviðskipta og landbúnaðar- og sjávarútvegsmála í Kína vegna fyrsta fundar íslensk-kínversku
viðskiptaviðræðunefndarinnar. Sú nefnd var stofnuð á grundvelli samstarfssamnings milli ríkjanna, sem Halldór
Ásgrímsson, utanríkisráðherra, undirritaði í Kína í ágúst 1995.
Á fundi íslensk-kínversku viðskiptaviðræðunefndarinnar verða einkum til umræðu leiðir til að efla viðskipti ríkjanna, m.a.
mögulegt samstarf á sviði sjávarútvegs, jarðvarma og fjárfestingar Kínverja í álveri á Íslandi. Einnig verður íslenskt
viðskiptaumhverfi kynnt og fiskvinnsluhús og sjávarútvegssýningin heimsótt.
Formenn nefndarinnar eru af hálfu Kínverja Hu Chusheng, yfirmaður Evrópuskrifstofu utanríkisviðskiptaráðuneytisins og
af hálfu Íslands Kristinn F. Árnason, skrifstofustjóri viðskiptaskrifstofu utanríkisráðuneytisins. Í íslensku sendinefndinni eru
jafnframt fulltrúar iðnaðar- og viðskiptaráðuneytisins, sjávarútvegsráðuneytisins, Þjóðhagsstofnunar og Útflutningsráðs
Íslands.