Þórdís Kolbrún á norrænum ráðherrafundi um aukið samstarf í tengslum við COVID-19 heimsfaraldurinn

Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra sat norrænan ráðherrafund um aukið samstarf Norðurlandanna í tengslum við COVID-19 heimsfaraldurinn. Ráðherrarnir ræddu þar um rannsóknir og nýsköpun á heilbrigðissviði, m.a. möguleikana á samstarfi um þróun og framleiðslu bóluefna og líftæknilyfja.

Ráðherra fór meðal annars yfir aðgerðir íslenskra stjórnvalda og samstarf hins opinbera og einkaaðila, m.a. við Íslenska erfðagreiningu, og hvernig samvinnan tryggði gott gengi í baráttunni við heimsfaraldurinn. Benti hún á að horfa mætti til reynslu Íslands í þeim efnum og að hún gæti komið að miklum notum í norrænu samstarfi til framtíðar. Ráðherra ræddi einnig mikilvægi viðspyrnu efnahagslífsins eftir heimsfaraldurinn og hlutverk nýsköpunar á því sviði.

Ráðherrarnir komu sér saman um að setja af stað vinnuhóp sem fær það verkefni að greina tækifæri til samvinnu og samræma aðgerðir  til að auka getu og hæfni Norðurlandanna til að bregðast við heimsfaraldri og styrkja stöðu þeirra á sviði heilbrigðisvísinda og heilbrigðistækni á alþjóðlegum vettvangi.