Nýr upplýsingavefur aðgerðahóps um launajafnrétti
Aðgerðahópur stjórnvalda og aðila vinnumarkaðar um launajafnrétti hefur opnað upplýsingavef um helstu verkefni sem hópurinn vinnur að og framvindu þeirra.
Á upplýsingavefnum er fjallað um tilurð aðgerðaáætlunar um launajafnrétti og skipan aðgerðahópsins. Fundargerðir hópsins eru birtar auk þess sem fjallað er um áhugavert efni og vísað í fróðleik um jafnréttismál á íslenskum vinnumarkaði og einnig hjá hinum Norðurlandaþjóðunum. Jafnframt er fjallað um nýlegar launakannanir og launarannsóknir og vísað er á efni um sambærileg verkefni hjá öðrum þjóðum.
Samkvæmt erindisbréfi eru verkefni aðgerðahópsins meðal annars að;
- vinna að samræmingu rannsókna á kynbundnum launamun,
- framkvæma tilraunaverkefni um innleiðingu jafnlaunastaðals,
- annast gerð áætlunar um kynningu og innleiðingu jafnlaunastaðalsins,
- standa fyrir sérstöku kynningarátaki og ráðgjöf í fyrirtækjum og stofnunum gegn kynbundnum launamun,
- annast gerð kynningarefnis um markvissar aðgerðir til að draga úr launamisrétti.
Rósa Guðrún Erlingsdóttir, sérfræðingur á skrifstofu lífskjara og vinnumála hjá velferðarráðuneytinu, starfar með aðgerðahópi um launajafnrétti og veitir allar nánari upplýsingar um starfsemina.