Íslensk heilsugæslusveit til Bosníu
FRÉTTATILKYNNING
frá utanríkisráðuneytinu
_____________
Nr. 83
Ísland hefur tekið þátt í friðargæslustörfum í Bosníu-Hersegóvínu síðan 1994, fyrst í friðargæslusveitum Sameinuðu þjóðanna, UNPROFOR og síðan í friðargæslusveitum undir forystu Atlantshafsbandalagsins, IFOR/SFOR eftir að þær tóku við af Sameinuðu þjóðunum.
Tveir íslenskir læknar, Erla Gerður Sveinsdóttir og Sólveig Dóra Magnúsdóttir og tveir íslenskir hjúkrunarfræðingar Emilía Petra Jóhannsdóttir og Þórunn Jónsdóttir fara til Bosníu-Hersegóvínu í dag
til að starfa í SFOR.
Íslenska heilsugæslusveitin mun starfa undir verkstjórn breska hersins í Bosníu-Hersegóvínu samkvæmt samstarfssamningi milli utanríkisráðuneytisins og breskra stjórnvalda. Sveitin hefur verið í þjálfunarbúðum breska hersins í Catterick frá því 25. ágúst sl. og kemur til með að dvelja við störf á bresku hersjúkrahúsi í borginni Sipovo og í sjúkraskýlum á nærliggjandi svæðum.