Fjárhagsaðstoð sveitarfélaga
Félags- og tryggingamálaráðuneytið, Samband íslenskra sveitarfélaga og Samtök félagsmálastjóra gerðu með sér samkomulag í desember 2007 um að ráðuneytið skyldi árlega uppfæra grunnfjárhæð vegna fjárhagsaðstoðar sveitarfélaga, í samræmi við hækkun á gengi neysluverðsvísitölu samkvæmt 21. gr. laga um félagsþjónustu sveitarfélaga, nr. 40/1991, og birta fjárhæðina í leiðbeiningum ráðuneytisins.
Í samræmi við þetta hefur ráðuneytið uppfært grunnfjárhæðir í leiðbeiningum sínum í samræmi við hækkun á neysluverðsvísitölu með sama hætti og gert var í desember 2007 og desember 2008. Miðað við gengi vísitölu neysluverðs í nóvember 2009 sem var þá 356,2 stig nemur grunnfjárhæð fjárhagsaðstoðar til einstaklings 125.540 kr., hækkar úr 115.567 kr., eða um 8,63%. Aðrar grunnfjárhæðir hækka um sama hlutfall.
Rétt er að ítreka að hér er um leiðbeinandi viðmið að ræða. Í samræmi við 21. gr. laga um félagsþjónustu sveitarfélaga, nr. 40/1991, er ákvörðun um fjárhagsaðstoð sveitarfélaga í höndum hvers og eins sveitarfélags.